كنت أفكر وش أكتب اليوم مقال الجمعة، وقلت دامنا نتابع الأخبار ونشوف الضربات الإسرائيلية على إيران، واللي معاها ارتفعت أسعار النفط ليش ما نغوص شوي في هالموضوع؟ خام برنت قفز تقريباً 10٪ ووصل قريب من 78 دولار للبرميل لكن وش السبب؟ ليش كل مرة تصير بوادر أو أزمة سياسية خصوصاً في الشرق الأوسط تطير أسعار النفط؟ وليش هالأرتفاع ما يصير بهالقوة إذا صارت أزمة في أماكن ثانية من العالم؟
الدول أول ما تسمع عن أزمة سياسية مباشرة أول شيء تفكر في أمنها الطاقي أولاً ما تبي يصير إنقطاع في الإمدادات خصوصًا إذا كانت تعتمد بشكل كبير على النفط عشان تشغيل المصانع ووسائل النقل عندها عشان كذا نشوف الدول الكبيرة مثل الصين والهند وأمريكا تبدأ تشتري كميات ضخمة من النفط حتى لو السعر مرتفع لأنها تبغى تضمن إنه ما ينقطع عنها.
وفوق هذا، أغلب هالدول عندها خزانات إحتياطية ضخمة وإذا شمّوا ريحة توتر، يبدؤون يعبّونها بسرعة لأنهم يتوقعون إن السعر بيزيد وهذا التصرف بحد ذاته يرفع الطلب ويرفع سعر النفط فوق حتى قبل لا يصير شيء فعلي على الأرض.
في شيء مهم لازم نذكره السوق ما يتحرك على الواقع بس لكن يتحرك على “التوقع” يعني كثير من الحكومات والشركات الكبيرة تشتري النفط وهي تتوقع أن الأزمة بتتوسع، فيبدون يشترون بدري عشان يحمون نفسهم من أي قفزة بعدها بالسعر فحتى لو ما صار هجوم مباشر على منشآت نفطية بس بمجرد وجود احتمال هذا كاف يخلي السوق يرتفع وهذا اللي يصير يعني لو تلاحظ ارتفع سعر النفط قبل حتى تضرب إسرائيل إيران.
طيب ليش الشرق الأوسط تحديداً حساس لهالدرجة؟ الأرقام تقول إن العالم كله ينتج تقريباً 100 مليون برميل يومياً لكن مضيق هرمز لحاله يمر منه حوالي 21 مليون برميل كل يوم، يعني يمثل تقريبًا ثلث صادرات النفط البحرية في العالم فأي تهديد لهذا المكان يعتبر “خطر جداً”، لأنه مكان واحد بديل يقدر يغطي هالكمية بسرعة وأي تعطيل فيه يرفع الأسعار مباشرة.
معلومة: كل دولار زيادة في سعر النفط يعني دخل إضافي ضخم لدول الخليج مثلاً، إذا ارتفع سعر البرميل دولار واحد فقط، دول الخليج (السعودية، الإمارات، الكويت، قطر، عُمان، البحرين) مع العراق يربحون حوالــي 78 مليون ريال سعودي يومياً من الزيادة هذي اللهم زد وبارك.
الحين نجي للسؤال المهم من المستفيد ومن المتضرر؟
المستفيدون هم الدول المصدرة مثل المملكة ودول الخليج وروسيا، لأن اقتصادهم معتمد على بيع النفط، فترتفع الميزانية ويصير فيه إنفاق داخلي أكثر، وحتى شركات النفط تكسب وأسهمها تطير أما المتضررين فهم الدول المستوردة للنفط مثل اليابان والهند والدول الأوروبية لأنهم يدفعون أكثر، وبالتالي بتزيد تكلفة الإنتاج والنقل، وهذا بيرفع الأسعار على المستهلك العادي، من البنزين، للكهرباء، إلى السلع الأساسية.
نراكم في مقال أخر 